Имрӯз дар толори Мақомоти иҷроияи ҳокимияти давлатии ноҳияи Шоҳмансур Иҷлосияи ҳаждаҳуми Маҷлиси вакилони халқи ноҳияи Шоҳмансур (даъвати шашум) бо баррасии муҳимтарин масъалаҳои иқтисодиву иҷтимоии ноҳия баргузор гардид.
Дар кори иҷлосияи мазкур, вакилони халқи ноҳияи Шоҳмансур, муовинони Раиси ноҳия, мудирони шуъба ва бахшҳои дастгоҳи Раиси ноҳия, воҳидҳои сохтории мақомоти иҷроия, сохторҳои қудратӣ, директорони муассисаҳои таълимӣ, мудирони муассисаҳои томактабӣ, раисони маҳаллаҳо, имомхатибони масҷидҳои панҷвақтаи ҷомеъ ва Васоити Ахбори Омма, ки вакил нестанд, иштирок намуданд.
Иҷлосия мутобиқи Қонуни Конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” ва дар асоси қарори иҷрокунандаи вазифаи Раиси ноҳияи Шоҳмансур муҳтарам Олимзода Сафар Маҳмадшо даъват шуда, бо садо додани Сурӯди миллии Ҷумҳурии Тоҷикистон оғоз гардид.
Ҳамзамон, қайд бояд намуд, ки мутобиқи моддаи 13-и Қонуни Конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” дар ҳолати вакил набудани иҷрокунандаи вазифаи Раиси ноҳия, Иҷлосияи Маҷлиси вакилони халқро вакили синну солаш калонтар мекушояд ва то интихоб шудани Раиси Маҷлиси вакилони халқ ба кори он раисӣ мекунад.
Пас аз интихоби ҳайати Котибот ва тасдиқи рӯзномаи иҷлосия ба дида баромадани масъалаҳои рӯзнома шурӯъ намуданд.
Ба муҳокимаи Иҷлосияи ҳаждаҳуми Маҷлиси вакилони халқи ноҳияи Шоҳмансур (даъвати шашум) масъалаҳои зерин гузошта шуданд:
1. Ҳисоботи муовини Раиси ноҳия оид ба иҷрои Нақша чорабиниҳо бахшида ба 35-солагии Истиқлолияти давлатии Ҷумҳурии Тоҷикистон ва рафти иҷрои корҳои сохтмонии иншоотҳои ҷашнӣ бахшида ба 33-солагии Истиқлолияти давлатии Ҷумҳурии Тоҷикистон;
2. Ҳисоботи муовини Раиси ноҳияи Шоҳмансур оид ба рафти иҷрои Фармони Президенти Ҷумҳурии Тоҷикистон аз 31 январи соли 2020, таҳти рақами 1445 “Дар бораи бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф эълон намудани солҳои 2020-2040” дар ноҳияи Шоҳмансури шаҳри Душанбе;
3. Дар бораи ҷамъбасти натиҷаҳои рушди иқтисодию иҷтимоии ноҳияи Шоҳмансури шаҳри Душанбе дар нимсолаи аввали соли 2024 ва вазифаҳо барои нимсолаи дуюм.
4. Дар бораи тасдиқи қарорҳои Раиси ноҳияи Шоҳмансури шаҳри Душанбе.
Дар интиҳои иҷлосияи мазкур, дар асоси масъалаҳои муҳокимашуда аз ҷониби иҷрокунандаи вазифаи Раиси ноҳияи Шоҳмансур дар самти корҳои ободонӣ ва кабудизоркунӣ ба пешвози ҷашни 35-солагии Истиқлолияти давлатӣ, пешгирии қонуншиканӣ дар байни ноболиғон ва ғайра масъалаҳои мубрами рӯз дар нимсолаи дуюми соли 2024 ба масъулин дастуру супоришҳои мушаххас дода шуда, қарорҳои дахлдор қабул гардиданд.
Бо ҳамин Иҷлосияи ҳаждаҳуми Маҷлиси вакилони халқи ноҳияи Шоҳмансур (даъвати шашум) бо садо додани Сурӯди миллӣ ба кори худ анҷом бахшид.
