Имрӯз бо ташаббуси Мақомоти иҷроияи ҳокимияти давлатии шаҳри Душанбе Форуми IV байналмилалии «Наврӯзи Душанбе - меҳвари робитаҳои фарҳангию сайёҳӣ» баргузор гардид.
Дар форум намояндаи Дастгоҳи иҷроияи Президенти Ҷумҳурии Тоҷикистон, роҳбарияти вазорату идораҳо, Мақомоти иҷроияи ҳокимияти давлатии шаҳри Душанбе, меҳмонони хориҷӣ, намояндагони корпуси дипломатӣ, раёсату идораҳо, муассисаҳои таҳсилоти миёна ва олии касбӣ, коршиносону муҳаққиқон, роҳбарони ширкатҳои сайёҳӣ ва намояндагони воситаҳои ахбори омма иштиок намуданд.
Муовини якуми Раиси шаҳри Душанбе Бахтиёр Шарифӣ иштирокдорони Форуми IV байналмилалии «Наврӯзи Душанбе - меҳвари робитаҳои фарҳангию сайёҳӣ»-ро хайрамақдам гуфта, тазаккур дод, ки форум бо мақсади тарғиби арзишҳои умумибашарии Иди байналмилалии Наврӯз, рушду тавсеаи соҳаи сайёҳӣ, ташаккул ва муаррифии бренди миллии сайёҳӣ, пешбурди маҳсулоти сайёҳӣ, истифодаи оқилонаи захираҳои табиию реакреатсионӣ ва мероси таърихию фарҳангии мамлакат, аз ҷумла шаҳри Душанбе, инчунин дар сатҳи баланд таҷлил намудани Иди байналмилалии Наврӯз баргузор карда мешавад.
Таъкид карда шуд, ки ҳамасола дар Ҷумҳурии Тоҷикистон, бахусус пойтахти он – шаҳри Душанбе бо иқдоми созандаи Раиси шаҳри Душанбе муҳтарам Рустами Эмомалӣ Иди байналмилалии Наврӯз дар сатҳи баланд ва бошукуҳ таҷлил карда шуда, дар доираи он чорабиниҳои мухталифи фарҳангию фароғатӣ, илмию амалӣ ва оммавию варзишӣ, аз қабили корвони шодиёнаи наврӯзӣ, барномаи рангини театрӣ, Форуми байналмилалии «Наврӯзи Душанбе — меҳвари робитаҳои фарҳангию сайёҳӣ», Фестивали байналмилалии сайёҳии «Наврӯзи Душанбе», барномаҳои консертӣ дар боғҳои фарҳангу фароғатӣ, мусобиқаҳои ҷумҳуриявию байналмилалии гӯштини миллӣ «Гӯштингирӣ», мусобиқаҳои кушод оид ба пойгаи аспдавонӣ ва бузкашӣ бо шаҳомати хосса баргузор мегарданд.
Дар идома иштирокдорон дар мавзуъҳои «Наврӯз - меросбари суннатҳои миллӣ», «Шаҳри Душанбе – ҳамчун маҳзани таъриху фарҳанги миллӣ», «Наврӯзи аҷам», «Қадимтарин навиштаҳои паҳлавӣ дар бораи Наврӯз», «Наврӯз ҳамчун бунёди ҷаҳонбинии миллӣ ва омили худшиносии миллӣ», «Парипарвашнома»-и Эрон Ҳассан Садидӣ дар мавзӯи «Наврӯз мардумҳоро муттаҳид месозад» ва «Нақши ҷашнҳои миллӣ, бахусус Наврӯзи байналмилалӣ дар брендикунонии миллии сайёҳӣ» маърӯзаҳо намуданд.
Таъкид гардид, ки ба шарофати истиқлолу озодӣ ва азму талошҳои пайгиронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Иди байналмилалии Наврӯз дар қатори дигар ҷашнҳои миллӣ мазмуну моҳияти нав пайдо карда, ба беҳтарин ойинҳои умумибашарӣ табдил ёфтааст, ки метавонад баҳри ҷалби таваҷҷуҳи ҷомеаи ҷаҳонӣ, аз ҷумла сайёҳону гардишгарон ба мероси бойи таърихию фарҳангии миллати тамаддунофари тоҷик ва мавзеъҳои сайёҳии мамлакат заминаи мусоид фароҳам оварад.
Яке аз ҳадафҳои асосии Тоҷикистон таъмини рушди устувори соҳаи сайёҳии мамлакат ба ҳисоб меравад. Барои ноил шудан ба ин ҳадафи олӣ ташаккул ва муаррифии тамғаи миллии сайёҳӣ, маркетинг ва пешбурди маҳсулоти соҳаи сайёҳӣ, ҳифз, инкишоф ва истифодаи оқилонаи захираҳои табиию реакреатсионӣ ва мероси таърихию фарҳангӣ муҳим арзёбӣ мегардад.
Наврӯз, Сада, Меҳргон ва Тиргон — ҳамчун решапайванди наслҳо, пайвандгари дирӯзу имрӯз, таҷассумгари суннатҳои неки ниёгон ва мероси нодири аҷдодамон метавонанд барои муаррифии таъриху фарҳанг, урфу одат ва имконияти сайёҳии мамлакат ҳамчун тамғаи миллии сайёҳӣ хизмат намоянд.
Дар замони муосир Наврӯз метавонад ҷузъи асосии стратегияи брендикунонии сайёҳии Тоҷикистон бошад. Ин идея метавонад ба рушди соҳаи сайёҳӣ дар кишвар кумак кунад ва Тоҷикистонро дар миқёси байналмилалӣ бештар муаррифӣ ва ҷолиб созад.
Таҳлилҳо нишон медиҳанд, ки агар брендикунонии Наврӯз дуруст иҷро шавад, Тоҷикистон метавонад ба макони фарҳангии боэътимод ва ҷазоби сайёҳӣ табдил ёбад. Маҳз тавассути навсозиҳо ва ҳамоҳангӣ Наврӯз метавонад рамзи муаррифии миллӣ ва байналмилалӣ гардида, дар рушди соҳаи сайёҳӣ, иқтисод ва фарҳанг мусоидат намояд.
Дар фарҷоми Форуми IV байналмилалии «Наврӯзи Душанбе - меҳвари робитаҳои фарҳангию сайёҳӣ» байни иштирокдорон музокира анҷом дода шуд.