Имрӯз дар Мақомоти иҷроияи ҳокимияти давлатии шаҳри Душанбе таҳти роҳбарии муовини якуми Раиси шаҳр Бахтиёр Шарифӣ, оид ба ҷамъбасти иҷрои Нақшаи чорабиниҳои корҳои ободонию созандагӣ бахшида ба 35-солагии Истиқлоли давлатии Ҷумҳурии Тоҷикистон ва таҳияи нақшаи 40-солагӣ, ҷаласаи гурӯҳи корӣ баргузор гардид. Дар ҷаласа рафти иҷрои чорабиниҳо, корҳои боқимонда ва масъалаҳои марбут ба татбиқи онҳо баррасӣ шуданд.

Иҷрои Нақшаи 35-солагӣ дар ноҳияҳои шаҳри Душанбе самарабахш ба роҳ монда шуда, дар доираи он 6 481 чорабинии сохтмонию навсозӣ ва ободонӣ амалӣ гардид. Ин нишондиҳанда аз нақшаи асосӣ 1,5 маротиба зиёд мебошад.

Дар ҷаласа ҳамчунин зарурати бартараф намудани камбудиҳо ва мушкилоти ҷойдошта ва таҳияи босифати Нақшаи чорабиниҳои 40-солагӣ таъкид гардида, сохторҳои шаҳрӣ ва ноҳияҳо вазифадор шуданд, ки пешниҳодҳои худро барои солҳои 2027–2031 сари вақт омода намуда, барои таҳияи нақшаи мукаммал ба Мақомот пешниҳод намоянд.