Имрӯз муовини Раиси шаҳри Душанбе муҳтарам Саломзода Раҳмиддин ва Раиси ноҳияи Шоҳмансур муҳтарам Олимзода Сафар Маҳмадшо тибқи нақша аз Раёсати истифодабарии роҳҳои Мақомоти иҷроияи ҳокимияти давлатии ноҳияи Шоҳмансур боздид намуда, ҳолати омодабошии техникаро ба фасли зимистон аз назар гузарониданд.
Зимни боздид омодагии техникаву таҷҳизоти махсус, воситаҳои хизматрасонӣ ва фаъолияти кормандони раёсат мавриди санҷиш қарор гирифта, ба масъалаи омодагии онҳо барои кор дар шароити номусоиди боду ҳаво таваҷҷуҳ зоҳир гардид.
Таъкид шуд, ки омодагии ҳамаҷонибаи техника ва фаъолияти муназзами кормандони масъул барои саривақт бартараф намудани оқибатҳои бориши барфу яхбандӣ, нигоҳдории роҳҳо ва таъмини ҳаракати бемонеаи нақлиёт аҳаммияти муҳим дорад.
Ба масъулон дастур дода шуд, ки ҳолати техникии воситаҳои махсусро мунтазам назорат намуда, ҷиҳати таъмини бехатарии сокинону меҳмонони пойтахт дар фасли зимистон тадбирҳои мушаххас андешанд.