Бо мақсади арҷгузорӣ ба мероси таърихию фарҳангӣ, ҳифзи табиати кишвар ва баланд бардоштани фарҳанги экологии аҳолӣ, бо Фармони Президенти Ҷумҳурии Тоҷикистон аз 21 октябри соли 2026 гулҳои Лола ва Сиёҳгӯш расман гулҳои миллӣ эълон гардиданд. Ин иқдом барои гиромидошти рамзҳои табиию маънавии халқи тоҷик ва муаррифии онҳо дар арсаи байналмилалӣ аҳаммияти хос дорад.
Лола ва Сиёҳгӯш дар табиат ва фарҳанги мардумии тоҷикон ҷойгоҳи вижа дошта, бо фарорасии баҳор ва ҷашни бостонии Наврӯз пайванди ногусастанӣ доранд. Гули Сиёҳгӯш аз нахустин муждарасонҳои баҳор ба шумор рафта, рамзи оғози зиндагии нав ва бедории табиат мебошад. Гули Лола бошад, бо рангу зебоии худ таҷассумгари ҳусну латофат ва шукуфоии табиати диёр аст.
Ин ду гул дар суннатҳои мардумӣ низ мақоми хос доранд. Пешиниёни мо бо шукуфтани Сиёҳгӯш омадани баҳору соли нави аҷдодиро истиқбол намуда, дар рӯзҳои наврӯзӣ ба сайри гули Лола мебаромаданд. Ин анъана, ки бо номи «Сайри гули Лола» ё «Сайри гули сурх» маъруф аст, то имрӯз идома дошта, ҳамасола моҳи апрел дар шаҳру ноҳияҳои мамлакат бо баргузории барномаҳои фарҳангӣ ва шодию сурур таҷлил мегардад.
Гули Сиёҳгӯш дар ривоятҳои куҳани ориёӣ низ ҷойгоҳи рамзӣ дорад. Пайванди он бо қиссаи Сиёвуш, ки дар «Шоҳнома»-и безаволи Абулқосими Фирдавсӣ тасвир шудааст, ба ин гул аҳаммияти таърихию асотирӣ мебахшад. Ҳамин гуна робитаи табиат бо адабиёту ривоятҳои миллӣ нишон медиҳад, ки гулҳо дар фарҳанги тоҷикон танҳо унсури зебоии муҳити зист набуда, балки ҷузъи хотираи таърихӣ ва суннатҳои мардумӣ низ мебошанд.
Табиати Тоҷикистон бо гуногунрангии наботот ва гулҳои нодиру дилрабоаш фарқ мекунад. Навъҳои гуногуни Лола ва Сиёҳгӯш дар минтақаҳои мухталифи кишвар мерӯянд. Расман гулҳои миллӣ эълон гардидани онҳо барои омӯзиши илмии навъҳои ин рустаниҳо, ҳифзи муҳити табиӣ ва пешгирӣ аз нобудшавии набототи нодир заминаи мусоид фароҳам меорад. Ҳамзамон, ин иқдом метавонад дар тарбияи эҳтиром ба табиат ва баланд бардоштани масъулияти экологии насли наврасу ҷавон нақши муассир дошта бошад.