Имрӯз, 31-уми августи соли ҷорӣ, дар муассисаи таҳсилоти миёнаи умумии №23-и ноҳияи Шоҳмансур шаҳри Душанбе вохӯрии вакилони Маҷлиси намояндагони Маҷлиси Олии Ҷумҳурии Тоҷикистон бо интихобкунандагон, фаъолон ва намояндагони ташкилоту муассисаҳои ноҳия баргузор гардид. Дар вохӯрӣ муовини раиси ноҳияи Шоҳмансур Зухурзода Заррина иштирок намуда, оид ба аҳамияти чунин мулоқотҳо дар таҳкими робитаи вакилони мардумӣ бо интихобкунандагон ва баррасии масъалаҳои муҳими ҷомеа андешаронӣ намуданд.

Зимни мулоқот вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатии Шоҳмансур №3, даъвати VII Амирзода Ориф Ҳамид оид ба дастовардҳои Ҷумҳурии Тоҷикистон дар даврони соҳибистиқлолӣ, рушди иқтисоди миллӣ, корҳои созандагию бунёдкорӣ ва дигар самтҳои муҳими рушди кишвар маълумот пешниҳод намуд.

Ҳамзамон, мудири бахши кор бо ҷавонон ва варзиши ноҳияи Шоҳмансури шаҳри Душанбе Исматов Анушервон дар бораи аҳамияти ватандӯстӣ, эҳсоси масъулияти шаҳрвандӣ ва омодагии ҷавонон ба ҳимояи Ватан андешаронӣ намуд. Зимни суханронӣ ҷавонон ба хизмати ихтиёрӣ дар сафи Қувваҳои Мусаллаҳи Ҷумҳурии Тоҷикистон ва иҷрои қарзи шаҳрвандии худ даъват карда шуданд.

Дар идомаи вохӯрӣ иштирокдорон вобаста ба масъалаҳои иҷтимоӣ, иқтисодӣ ва дигар масъалаҳои рӯзмарра андеша ва пешниҳодҳои худро баён намуданд. Вакили Маҷлиси намояндагон ба саволҳои иштирокдорон посух дода, ҷиҳати баррасӣ ва ҳалли масъалаҳои пешниҳодгардида омодагии худро изҳор намуданд.