Муҳтарам собиқадорон ва кормандони арҷманди соҳаи тиб!

Боиси ифтихор ва сарбаландӣ аст, ки ҳамасола 18 август дар Ҷумҳурии Тоҷикистон Рӯзи кормандони соҳаи тиб ҳамчун тантанаи инсондӯстӣ, касбият ва арҷгузорӣ ба заҳматҳои пурмасъулияти табибон, ҳамшираҳои шафқат ва тамоми кормандони соҳаи тандурустӣ бо шукуҳу шаҳодат таҷлил мегардад.

Ба ин муносибати фархунда, ҳамаи Шуморо табрик гуфта, пеш аз ҳама, бароятон тансиҳатӣ, хотирҷамъӣ, рӯзгори обод ва дар пешбурди фаъолияти пурмасъули касбӣ барору муваффақиятҳои рӯзафзун орзу менамоям.

Имрӯз соҳаи тандурустӣ яке аз рукнҳои калидии сиёсати иҷтимоии давлат ба шумор рафта, дар замони соҳибистиқлолӣ босуръат рушд карда истодааст. Ҳифзи солимии аҳолӣ, гузариш ба стандартҳои муосири хизматрасонии тиббӣ, рақамикунонии низоми соҳа ва омодасозии кадрҳои баландихтисос аз талаботи асосии ҷомеаи муосири мо мебошанд.

Дар ин раванд, саҳми табибон ва кормандони соҳа, ки бо истифода аз технологияҳои навин ва донишу малакаи муосир ба халқу ватан содиқона хизмат мекунанд, бениҳоят арзишманд ва шоёни таҳсин аст.

Бо шарофати сиёсати созанда ва дурандешонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгириҳои бевоситаи Раиси шаҳри Душанбе муҳтарам Рустами Эмомалӣ соҳаи тандурустӣ пайваста таҳким ёфта, тадбирҳои муҳим ҷиҳати бунёди муассисаҳои тиббии ҷавобгӯ ба талаботи байналмилалӣ ва баланд бардоштани сатҳу сифати хизматрасонӣ амалӣ мегарданд.

Миллати куҳанбунёди тоҷик аз қадим бо номи донишмандони бузург ва ситораҳои дурахшони илми тиб, пеш аз ҳама, Абӯалӣ ибни Сино дар рушди тибби ҷаҳонӣ саҳми бузург гузоштааст.

Хушбахтона, имрӯз низ табибони тоҷик бо эҳсоси баланди масъулият ва садоқат ба қасами Гиппократ ин анъанаҳои некро бо маҳорати баланди касбӣ идома дода, дар беҳбудии сифати зиндагӣ ва саломатии ҷомеа нақши сазовор мегузоранд.

Итминон дорам, ки кормандони соҳаи тандурустии ноҳияи Шоҳмансури шаҳри Душанбе минбаъд низ бо меҳру самимият, муносибати эҳтиромона бо беморон ва ташаббусҳои созанда баҳри пешрафти соҳа ва татбиқи стандартҳои муосири хизматрасонӣ саҳми арзандаи худро мегузоранд.

Бори дигар, ҳамаи Шумо – собиқадорони муҳтарам, табибони оқилу ғамхор ва тамоми кормандони соҳаи тандурустиро ба ин иди касбӣ самимона муборакбод гуфта, бароятон тансиҳатии комил, бахту саодати оилавӣ ва дар фаъолияти пурифтихоратон дастовардҳои бузург таманно дорам.

Рӯзи кормандони соҳаи тиб муборак бошад!