Дар партави сиёсати фарҳангпарварона ва созандаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ташаббусҳои наҷибу созандаи Раиси шаҳри Душанбе муҳтарам Рустами Эмомалӣ бахшида ба ҷашни 35-солагии Истиқлолияти давлатии Ҷумҳурии Тоҷикистон дар пойтахти кишвар баргузории рӯзҳои фарҳангии шаҳру ноҳияҳои ҷумҳурӣ бо шукуҳу шаҳомати хоса идома дорад.

Рӯзҳои фарҳангии шаҳру ноҳияҳои ҷумҳурӣ дар шаҳри Душанбе тибқи «Ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон барои соли 2026», ки бо Амри Президенти Ҷумҳурии Тоҷикистон аз 2 январи соли 2026 тасдиқ шудааст, моҳҳои июн–августи соли равон баргузор шуда истодаанд.

Дар доираи чорабинии мазкур сокинону меҳмонони пойтахт имконият пайдо намуданд, ки бо намоиши маҳсулоти кишоварзию саноатӣ, ҳунарҳои мардумӣ ва таомҳои миллии ноҳияҳои Лахш ва Сангвор шинос шуда, маҳсулоти пешниҳодшударо бо нархҳои дастрас харидорӣ намоянд.

Дар ин замина, дар Боғи фарҳангию фароғатии ба номи Низомиддин Алишер Навоӣ рӯзҳои фарҳангии ноҳияҳои Лахш ва Сангвор баргузор гардида, маҳсулоти кишоварзию саноатӣ, ҳунарҳои мардумӣ, таомҳои миллӣ ва барномаи рангини фарҳангиву адабӣ пешкаши сокинону меҳмонони пойтахт гардонида шуд.

Дар чорабинии мазкур намояндаи Ҳукумати Ҷумҳурии Тоҷикистон, муовини Раиси шаҳри Душанбе, роҳбарияти ноҳияи Шоҳмансури шаҳри Душанбе, Директори Агентии хизмати давлатии назди Президенти Ҷумҳурии Тоҷикистон, Раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, Раиси ноҳияи Рашт, Раиси ноҳияи Лахш, Раиси ноҳияи Сангвор, инчунин меҳмонону масъулин иштирок намуданд.

Зимни боздид меҳмонон аз намоиши маҳсулоти кишоварзию саноатӣ, маҳсули дасти ҳунармандони мардумӣ, таомҳои миллӣ ва дастовардҳои ноҳияҳои Лахш ва Сангвор шинос гардида, ба сатҳу сифати маҳсулоти пешниҳодшуда баҳои баланд доданд.

Ҳамзамон, аҳли фарҳанг ва ҳунармандони ноҳияҳои Лахш ва Сангвор бо пешниҳоди барномаи рангини фарҳангиву консертӣ, суруду таронаҳои ватандӯстона ва рақсу оҳангҳои миллӣ табъи иштирокчиёнро болида гардонида, фарҳангу суннатҳои неки миллати тоҷикро муаррифӣ намуданд.

Дар доираи чорабинӣ барои ҳамкориҳои мутақобилан судманд ва саҳми арзанда дар баргузории рӯзҳои фарҳангӣ ба масъулини ноҳияҳои Лахш ва Сангвор Сипосномаи Мақомоти иҷроияи ҳокимияти давлатии ноҳияи Шоҳмансури шаҳри Душанбе тақдим карда шуд.

Бояд зикр намуд, ки баргузории рӯзҳои фарҳангии шаҳру ноҳияҳои ҷумҳурӣ дар шаҳри Душанбе ба таҳкими дӯстиву ҳамдигарфаҳмӣ, рушди муносибатҳои фарҳангӣ, муаррифии дастовардҳои даврони соҳибистиқлолӣ ва эҳёи анъанаҳои миллӣ мусоидат намуда, дар доираи омодагиҳо ба таҷлили 35-солагии Истиқлолияти давлатии Ҷумҳурии Тоҷикистон аҳамияти муҳим ва арзишманд дорад.