15px

МАҚОМОТИ ИҶРОИЯИ ҲОКИМИЯТИ ДАВЛАТИИ НОҲИЯИ ШОҲМАНСУРИ ШАҲРИ ДУШАНБЕ

  • Асосӣ
  • Хабарҳо
  • Президент
    • Вохӯриҳо
    • Суханрониҳо
    • Сафарҳои дохилӣ
    • Сафарҳои хориҷӣ
    • Фармонҳо
    • Паёмҳо
    • Барқияҳо
    • Суҳбатҳои телефонӣ
    • Аксҳо
  • Маъмурият
    • Раис
    • Муовинони Раис
    • Дастгохи раис
  • Тақсимоти маъмурӣ
    • Шиносномаи ноҳия
    • Соҳаи комуналӣ
    • Соҳаи иқтисодӣ
    • Соҳаи иҷтимоӣ
    • Соҳаи дин
    • Маориф
    • Тандрустӣ
    • Фарҳанг
    • Ҷавонон ва варзиш
    • Кор бо занон
    • Меъморӣ ва шаҳрсозӣ
    • Ҳунарҳои мардумӣ
  • Аз паём то паём
  • Стратегия
  • Душанбе — пойтахт
  • Нақшаи кулл
  • Нома ба Раис
  • Эълонҳо
  • Тамос
  1. Асоси

РӮЗИ ПРЕЗИДЕНТ – РАМЗИ СУЛҲУ ВАҲДАТ, ДАВЛАТДОРИИ МИЛЛӢ ВА РУШДИ УСТУВОРИ ТОҶИКИСТОН

Дар таърихи ҳар як миллат санаҳое ҳастанд, ки на танҳо рӯйдодҳои муҳимми гузашта, балки марҳилаҳои тақдирсоз ва самтҳои асосии рушди минбаъдаи давлатро таҷассум менамоянд.
Барои мардуми шарифи Тоҷикистон 16 ноябр аз ҷумлаи чунин санаҳои дорои аҳаммияти бузурги таърихӣ ва сиёсӣ мебошад. Ҳамасола дар ин рӯз Рӯзи Президенти Ҷумҳурии Тоҷикистон таҷлил гардида, хизматҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи таҳкими давлатдории миллӣ, таъмини сулҳу субот, ваҳдати миллӣ ва пешрафти кишвар арҷгузорӣ карда мешаванд.
Рӯзи Президент, пеш аз ҳама, ба дарки аҳаммияти сулҳу оромӣ, истиқлоли давлатӣ ва масъулияти таърихии ҳар як шаҳрванд дар назди Ватан пайванди ногусастанӣ дорад. Ин сана ба марҳилаи муҳими ташаккули давлатдории навини тоҷикон иртибот дошта, ёдоварӣ аз он аст, ки суботи сиёсӣ, ваҳдати миллӣ ва рушди устувор бо талошҳои пайгирона, иродаи қавӣ ва масъулияти баланди роҳбариву шаҳрвандӣ таъмин мегарданд.
Солҳои аввали соҳибистиқлолӣ барои Тоҷикистон давраи бисёр мураккабу сарнавиштсоз буданд. Ҷанги таҳмилии шаҳрвандӣ, буҳрони шадиди сиёсиву иқтисодӣ, нооромии ҷомеа ва мушкилоти иҷтимоӣ пояҳои давлатдории навини кишварро зери фишори ҷиддӣ қарор дода буданд. Дар чунин шароити ҳассос Иҷлосияи XVI Шурои Олии Ҷумҳурии Тоҷикистон, ки моҳи ноябри соли 1992 баргузор гардид, дар муайян намудани самти минбаъдаи давлатсозӣ нақши муҳим бозид. Интихоби муҳтарам Эмомалӣ Раҳмон ба мақоми Раиси Шурои Олии Ҷумҳурии Тоҷикистон оғози марҳилаи муҳими фаъолияти сиёсии роҳбаре гардид, ки минбаъд тамоми неруи худро ба роҳи барқарорсозии сулҳ, сарҷамъ намудани миллат ва таҳкими пояҳои давлатдорӣ равона намуданд.
Бо ташаббус ва талошҳои пайгиронаи Пешвои муаззами миллат раванди музокироти сулҳ, бозгардонидани гурезаҳо, барқарорсозии сохторҳои давлатӣ ва эҳёи иқтисоди миллӣ вусъат гирифт. Имзои Созишномаи умумии истиқрори сулҳ ва ризоияти миллӣ 27 июни соли 1997 дар таърихи муосири Тоҷикистон саҳифаи нав кушод. Ин рӯйдоди сарнавиштсоз барои барқарор гардидани сулҳу оромӣ, таҳкими ваҳдати миллӣ ва оғози марҳилаи созандагиву бунёдкорӣ заминаи мусоид фароҳам овард. Таҷрибаи сулҳи тоҷикон имрӯз низ аҳаммияти худро нигоҳ дошта, нишон медиҳад, ки бо иродаи сиёсӣ, муколама ва ҳамдигарфаҳмӣ метавон ҳатто мушкилтарин ихтилофҳоро ҳал намуд.
Дар даврони соҳибистиқлолӣ таҳти роҳбарии Сарвари давлат муҳтарам Эмомалӣ Раҳмон дар соҳаҳои гуногуни ҳаёти мамлакат дигаргуниҳои муҳим ба амал омаданд. Таҳкими сохторҳои давлатӣ, такмили заминаҳои ҳуқуқии давлатдорӣ, бунёди роҳу нақбҳо, пулҳо ва иншооти муҳими энергетикӣ, рушди маорифу тандурустӣ, эҳёи арзишҳои таърихию фарҳангӣ ва тавсеаи муносибатҳои байналмилалӣ аз ҷумлаи самтҳои муҳими пешрафти кишвар мебошанд. Истиқлоли энергетикӣ ва таъмини амнияти озуқаворӣ, ки дар сиёсати давлатии Тоҷикистон ҷойгоҳи муҳим доранд, барои рушди иқтисоди миллӣ ва беҳтар гардидани шароити зиндагии мардум аҳаммияти стратегӣ касб менамоянд. Дар ин раванд татбиқи лоиҳаҳои бузурги инфрасохторӣ, аз ҷумла сохтмони Неругоҳи барқи обии «Роғун», барои ояндаи иқтисодии кишвар имкониятҳои нав фароҳам меорад.
Нақши Пешвои муаззами миллат дар таҳкими мавқеи байналмилалии Тоҷикистон низ назаррас мебошад. Иқдомҳои байналмилалии кишвар дар масъалаҳои обу иқлим, ҳифзи пиряхҳо, таъмини амният ва густариши ҳамкориҳои минтақавӣ ба муаррифии Тоҷикистон ҳамчун давлати сулҳпарвару ташаббускор мусоидат кардаанд. Тақвияти муносибатҳои дӯстона бо кишварҳои ҳамсоя ва ба даст овардани созишҳои муҳими минтақавӣ барои таҳкими эътимод, густариши робитаҳои иқтисодиву фарҳангӣ ва фароҳам овардани шароити мусоид барои зиндагии осоиштаи мардум аҳаммияти хос доранд.
Дар баробари ин, рушди пойтахти кишвар – шаҳри Душанбе – намунаи равшани дигаргуниҳои созанда дар даврони соҳибистиқлолӣ мебошад. Бо дастгирӣ ва роҳнамоии Пешвои муаззами миллат муҳтарам Эмомалӣ Раҳмон ва дар натиҷаи фаъолияти пайгиронаи Раиси шаҳри Душанбе муҳтарам Рустами Эмомалӣ пойтахт симои нав касб намуда, инфрасохтори шаҳрӣ, роҳу хиёбонҳо, боғу гулгаштҳо, муассисаҳои иҷтимоӣ ва иншооти муосир пайваста рушд меёбанд. Ин дигаргуниҳо на танҳо ба ободонии муҳити шаҳр, балки ба баланд гардидани сифати хизматрасонӣ, фароҳам омадани шароити мусоид барои сокинон ва ҷолибияти бештари Душанбе мусоидат менамоянд.
Ноҳияи Шоҳмансур ҳамчун ҷузъи муҳими пойтахт низ дар ин раванди созандагӣ саҳми худро мегузорад. Ободонии кӯчаву маҳаллаҳо, беҳтар намудани инфрасохтори иҷтимоӣ, нигоҳдории муҳити зист, рушди маорифу фарҳанг ва фароҳам овардани шароити мусоид барои зиндагиву фаъолияти сокинон аз ҷумлаи самтҳои муҳими фаъолияти Мақомоти иҷроияи ҳокимияти давлатии ноҳия мебошанд. Мо хуб дарк менамоем, ки пешрафти устувори давлат аз заҳмати содиқонаи ҳар як шаҳрванд, риояи қонун, эҳтироми арзишҳои миллӣ ва саҳмгузорӣ дар ободии маҳалли зист оғоз мегардад.
Рӯзи Президент, ҳамзамон аҳаммияти тарбиявию маънавӣ дорад. Ин сана моро ба эҳтироми таърихи давлатдории миллӣ, ҳифзи сулҳу ваҳдат, таҳкими худшиносӣ ва масъулиятшиносӣ ҳидоят менамояд. Махсусан, барои насли ҷавон муҳим аст, ки арзиши истиқлолиятро дарк намуда, бо донишандӯзӣ, касбомӯзӣ, ташаббускорӣ ва меҳнати созанда дар пешрафти Тоҷикистони азиз саҳм гузорад. Зеро ояндаи давлат на танҳо ба дастовардҳои имрӯза, балки ба сатҳи маърифат, ҷаҳонбинӣ ва масъулияти наслҳои оянда вобаста мебошад.
Мо, ҳамчун шаҳрвандони Тоҷикистони соҳибистиқлол, вазифадорем, ки сулҳу оромӣ, ваҳдати миллӣ ва дастовардҳои даврони истиқлолиятро ҳифз намуда, барои боз ҳам ободу пешрафта гардидани Ватани маҳбубамон талош намоем. Рӯзи Президент моро бори дигар ба андешидани масъулияти шаҳрвандӣ, қадршиносии сулҳу субот ва идомаи корҳои созандагиву бунёдкорӣ даъват мекунад.
Бигзор сулҳу ваҳдати миллӣ пойдор, истиқлоли давлатии Ҷумҳурии Тоҷикистон устувор ва Ватани азизи мо ҳамеша ободу шукуфон бошад!
Олимзода Сафар Маҳмадшо,
Раиси ноҳияи Шоҳмансур